Republika e Shqipërisë
Qendra “Erikiana”

Projekt-propozim

 Për ndërhyrje me veprimtari për zhvillimin dhe integrimin e komunitetit rom në qytetin e Elbasanit

(Përmbledhje e përgjithshme e projekt-propozimit)

Paraqitje e përgjithshme e nevojës për ndërhyrje

 Në lindje të qytetit të Elbasanit në jug të lagjes “5 Maj” jeton një komunitet rom prej rreth 800 familjesh me një numër të përgjithshëm prej rreth 6 500 banorësh. Mosha mesatare e këtij komuniteti është 32 vjeç. Ky komunitet pothuajse që prej 10 vjetësh është vendosur në këtë zonë duke zhvilluar traditën, gjuhën dhe zakonet e tyre. Kjo bashkësi po përballet me probleme të tilla si: fenomene të mosintegrimit në tërësinë e shoqërisë shqiptare, prapambetje në integrimin arsimor, mangësi në njohjen e të drejtave të njeriut dhe të edukimit qytetar në kuptimin e përgjithshëm dhe perëndimor të këtij termi. Deri më sot, komuniteti i romëve në qytetitn e Elbasanit ka qenë subjekt i ndërhyrjes edhe i organizatave të tjera jo-qeveritare. Kështu përmendim organizatën "Forumi i pavarur i gruas shqiptare", me projekte në drejtim kryesisht të zhvillimit të gruas rome, po ashtu edhe shoqatat "Shëndeti Publik" dhe "Në familje për familjen"., si edhe "Shoqata e romëve të Shqipërisë". Nga gjithë veprimtaria e këtyre shoqatave, përfundimi është se pikërisht për komunitetin rom në Elbasan mbetet akoma shumë për tu bërë. Nga kontaktet dhe konsultimet me organizatat që kontribuojnë në të njëjtën fushë ne kemi arritur në përfundimin se integrimi i romëve, në këtë fazë duhet realizuar jo-vetëm duke ndërhyrë në përmirësimin e gjendjes së tyre ekonomike dhe njohjen e të drejtave të njeriut, por para së gjithash integrimi i romëve do të realizohet nëpërmjet vetëdijësimit të tyre për vlerat e kulturës, gjuhës dhe traditave të tyre. Një nevojë e madhe në këtë drejtim paraqet vetëdijësimi i romëve për nevojën e  formalizimit të kulturës së tyre gjuhësore. Me fjalë të tjera duhet bërë më shumë punë për mësimin e gjuhës rome, për trainimin e mësuesve të gjuhës rome si edhe duhen angazhuar specialistët linguistë që do të merren me problemet e shkrimit dhe formalizimit të saj. 

 Objektivi i projekt-propozimit

Të ndërhyjë me një sistem shkollash verore dhe shkollash me shkëputje nga puna në arsimimin e fëmijëve romë në gjuhën e tyre. Projekti i shkollës verore do të përfshijë dhe formalizimin dhe arsimimin e romëve dhe të qytetarëve të tjerë të interesuar me vlerat e kulturës rome. Përfshirja në këtë shkollë e qytetarëve jo-romë jo vetëm si specialistë, por edhe si pjesëmarrës në këtë shkolla verore do të shërbejë me rezulta edhe të matshme integrimit rom në shoqëri.

Grupi i synuar: Komuniteti rom i lagjes “5 Maj” Elbasan.

Kohëzgjatja e projektit: 12 muaj

Institucionet zbatuese: Qendra “Erikiana”, Bashkia Elbasan, Drejtoria Arsimore Elbasan, ekspertë nga universiteti "A.Xhuvani"

Veprimtaritë kryesore të projektit: 

• Ngritja e bazave të një institucioni jo-formal për mësimdhënien e gjuhës dhe kulturës rome në moshat shkollore dhe më gjërë. Afrimi në këtë institucion i fëmijëve dhe të rinjve jo-romë.
• Veprimtaritë kryesore të projektit: Trainimi i mësuesve që do të japin mësim bazat e gjuhës rome;
• Ngritja e kursit joformal të mësimit të gjuhës rome;
• Sensibilizimi i familjeve rome për pjesëmarrje sa më të gjërë të fëmijëve dhe të rinjve romë në këtë kurs;
• Sensibilizimi dhe afrimi i të rinjve dhe fëmijëve jo-romë në këtë kurs. Kjo mendohet se i shërben qëllimit të përgjithshëm të projektit 2që është integrimi i romë në shoqërinë shqiptare;
• Ngritja e një shkolle verore të zonës për mësimin e gjuhës dhe kulturës rome në komunitet dhe më gjërë.

Shënim: Qendra “Erikiana” ka arritur në përfundimin për nevojën e ndërhyrjes me një projekt të tillë mbas një proçesi të gjatë dhe formal të vlerësimit të nevojave, materialet e të cilit nuk u pa e arsyeshme të paraqiten në përmbledhjen e këtij projek-propozimi. Po kështu në përmbledhjen e projekt propozimit nuk është paraqitur edhe kalendari i detajuar i veprimtarive si dhe buxheti i nevojshëm. Këto shoqata i ka të trajtuara në projekt propozimin e plotë të saj.

Qendra “Erikiana”

Presidenti

Gëzim BACKA

Elbasan 13.03.02

[Faqja Kryesore] [Shërbime] [Projekt 1] [Projekti 2] [Projekti 3] [Informacione] [Linke]

  Feel free to e-mail webmaster for any questions, comments about this web-site
Copyright 2003. Qendra “Erikiana”